Nanawagan si Zamboanga del Norte Governor Darel Dexter T. Uy sa publiko nga makigtambayayong sa mga awtoridad aron mailhan ug madakpan ang mga suspek sa pagpamusil nga nahitabo sa Barangay Kauswagan, Baliguian niadtong Hunyo 27.
Sumala sa gobernador, gipusil sa duha ka wala mailhing riding-in-tandem si Peter A. Montina, o mas nailhan nga “Bado” Montina, alas 4:35 sa hapon. Ang mga suspek nagsakay og pula nga Rusi nga motorsiklo ug midangop paingon sa lungsod sa Siocon human sa insidente.
Giawhag usab ni Gov. Uy ang mga saksi ug mga residente nga adunay nahibaloan nga impormasyon, CCTV footage, o dashcam recordings sa ruta sa Baliguian ug Siocon nga ipahibalo kini sa mga awtoridad aron mapaspasan ang imbestigasyon.
Gipasalig sa gobernador nga kompidensyal ang tanang impormasyon nga ihatag sa publiko samtang nagpadayon ang paningkamot sa mga otoridad sa pagdakop sa mga responsable ug pagmintinar sa kalinaw ug kahapsay sa lalawigan.(IKEN B. GULLEM)
Source: Zamboanga del Norte Provincial News Network