SINDANGAN, Zamboanga del Norte — Daling girespondehan sa mga personnel sa Sindangan Central Fire Station ang usa ka vehicular accident sa Barangay Motibot, diin usa ka pasyente ang naangol ug gidala sa ospital alang sa dugang nga pagtambal.
Sa pag-abot sa rescue team sa Motibot Health Center, ilang nakit-an ang pasyente nga naglingkod samtang naghulat og medikal nga atensyon. Sa inisyal nga assessment, nasuta nga adunay samad sa agtang, bun-og sa wala nga bahin sa ulo, ug pagdugo gikan sa wala nga dunggan.
Gihatagan dayon og first aid ang pasyente pinaagi sa paglimpyo sa samad gamit ang antiseptic solution ug padayon nga pagmonitor sa kahimtang niini aron masiguro nga walay seryosong komplikasyon nga resulta sa posibleng head injury.
Human ma-stabilize, gidala ang pasyente sakay sa BFP rescue vehicle ngadto sa Sindangan District Hospital alang sa dugang nga medical evaluation ug pag-atiman. Hapsay usab nga giturn-over ang pasyente ngadto sa nurse-on-duty sa ospital.
Ang maong insidente nagpakita pag-usab sa kahinungdanon sa paspas nga emergency response ug sa andam nga serbisyo sa mga rescuers aron masiguro ang kaluwasan ug hustong pag-atiman sa mga biktima sa aksidente.(JENIFFER JR. DELICA)
Source: BFP R9 Sindangan Municipal Fire Station V2