Nagpadayon ang Cebu City Police Office (CCPO) sa pagpalig-on sa kalinaw ug kahapsay sa dakbayan pinaagi sa ilang Safer Cities Initiative nga gipatuman ubos sa Oplan Bulabog, Oplan Bakal Sita, ug Oplan Pakigsandurot.
Gipangulohan kini ni CCPO Officer-in-Charge PCOL Arnel J. Apud aron masiguro ang kaluwasan sa mga residente sa Sugbo.
Gikan sa alas-12:01 sa kadlawon sa Abril 8 hangtod alas-6 sa buntag sa Abril 14, 2026, nakapahigayon ang CCPO og 589 ka operasyon nga misangpot sa 2,958 ka natala nga disposisyon o aksyon batok sa nagkalain-laing kalapasan sa mga ordinansa sa siyudad.
Base sa report, 1,280 ka mga paglapas sa City Traffic Ordinance ang natala, nga mao ang labing daghang kaso.
Gisundan kini sa 596 ka curfew violations nga naglambigit sa mga menor de edad, 400 ka kaso sa pagpanigarilyo sa publikong lugar, 340 ka kaso sa paglakaw nga walay sapot sa taas nga lawas, ug 313 ka kaso sa pag-inom og ilimnong makahubog sa publikong lugar.
Nadakpan usab ang walo ka establisemento tungod sa pagpadayon sa karaoke lapas sa gitugot nga oras, pito ka kaso sa ilegal nga mga istruktura o mga babag sa dalan, ug 13 ka uban pang paglapas sa lokal nga mga ordinansa. Walay natala nga kaso sa vandalism sulod sa maong panahon.
Sa kinatibuk-an, 1,318 ka mga lumalapas ang gipamultahan samtang 1,640 ang gipahimangnoan ug gibuhian.
Sumala sa CCPO, magpadayon ang ilang mga operasyon aron mapadayon ang kahapsay, kalinaw, ug kaluwasan sa Cebu City pinaagi sa lig-on nga pagpatuman sa balaod ug pakigtambayayong sa komunidad.
I via Renante Socia Lada