SINDANGAN, Zamboanga del Norte — Nagkahiusa ang mga opisyal ug empleyado sa Lokal nga Pangagamhanan sa Sindangan uban sa mga representante sa nagkalain-laing nasudnong ahensya sa pagsaulog sa ika-128 nga Adlaw sa Kagawasan sa Pilipinas niadtong Hunyo 12.
Gipasidunggan sa maong kalihokan ang kaisog, patriotismo ug dakong sakripisyo sa mga bayani nga nakigbisog aron maangkon sa nasud ang kagawasan nga ginatagamtam karon sa mga Pilipino.
Atol sa selebrasyon, gipakita sa mga partisipante ang ilang panaghiusa ug padayon nga suporta sa mga programa alang sa pagserbisyo sa katawhan, pagpalig-on sa nasudnong panaghiusa ug pagpauswag sa komunidad.
Gihinumdoman usab ang kahinungdanon sa pagpreserbar sa kagawasan pinaagi sa hiniusang paningkamot sa matag sektor aron masiguro ang mas malinawon ug mauswagon nga kaugmaon alang sa tanang Sindanganon.
Sa pagsaulog sa maong makasaysayanong adlaw, gipadayag sa lungsod ang pasalig sa pagpadayon sa mga prinsipyo sa kagawasan, serbisyo publiko ug tinuoray nga pagserbisyo alang sa katawhan.(JENIFFER JR. DELICA)
Source: Municipality of Sindangan