DAPITAN CITY — Midawat ang 69 ka benepisyaryo sa ayuda ilawom sa TUPAD o Tulong Panghanapbuhay sa Ating Disadvantaged/Displaced Workers Program, usa ka inisyatiba nga nagtumong sa paghatag og temporaryong trabaho ug pinansyal nga suporta sa mga kwalipikadong Dapitanon.
Pinaagi sa programa, nakadawat og kita ang mga benepisyaryo samtang nagserbisyo sa ilang komunidad, nga makatabang sa ilang adlaw-adlaw nga panginahanglan ug pagsuporta sa ilang pamilya.
Gipasalamatan usab sa lokal nga pangagamhanan ang Department of Labor and Employment (DOLE) ug ang mga kaabag nga ahensya ug organisasyon nga mitabang aron mapatuman ang maong programa.
Matud sa mga opisyal, ang TUPAD usa sa mga lakang aron matabangan ang mga trabahanteng naapektuhan sa kakulang sa panginabuhian ug aron mahatagan sila og dugang oportunidad sa pagkita og kita.
Nagpadayon ang Dapitan City sa pagpalapad sa mga programang makatabang sa panginabuhian ug kaayohan sa katawhan aron mas daghang pamilya ang makabenepisyo sa serbisyo sa gobyerno.(JENIFFER JR. DELICA)
Source: Mayor Belen UY