Naghiusa ang mga health workers, kabatan-onan, ug mga residente sa Sindangan atol sa International AIDS Candlelight Memorial Activity kaniadtong Mayo 23 nga gipahigayon sa Rural Health Unit of Sindangan sa Municipal Plaza aron mapalig-on ang awareness ug adbokasiya batok HIV ug AIDS.
Sa iyang mensahe, gipasiugda ni Dr. Rex V. Samson ang kahimtang sa HIV cases ug ang kahinungdanon sa sayong testing ug treatment. Iyang gipahinumdoman ang publiko nga pinaagi sa modernong tambal, posible na nga mabuhi nga normal ug produktibo ang Persons Living with HIV (PLHIV).
Gihatagan usab og dugang kahibalo ang mga partisipante pinaagi sa paghisgot ni Sittie Samaidah Rackman kabahin sa kasaysayan sa HIV ug AIDS ug sa panginahanglan nga wagtangon ang diskriminasyon. Samtang, gihagit ni HIV Program Coordinator Marlou Joseph P. Magtajas ang komunidad nga magpabiling aktibo sa kampanya alang sa prevention ug awareness.
Nahimong sentro sa kalihokan ang candle-lighting ceremony isip paghinumdom sa mga kinabuhi nga nawala tungod sa AIDS-related causes ug isip simbolo sa paglaom ug panaghiusa sa padayong pakigbatok kontra HIV ug AIDS. Gitapos ang programa pinaagi sa closing remarks ni Gay G. Alas.(IKEN B. GULLEM)
Source: RHU Sindangan