Gisusi ni Mayor Roberto Lim Uy Jr. ang makasaysayanong Shin’yō Maru shipwreck site uban sa mga miyembro sa Hellships Memorial Foundation isip kabahin sa padayong paningkamot sa pagpreserba ug pagdokumento sa usa sa labing mahinungdanong World War II heritage landmarks sa Liloy.
Kauban sa site inspection sila si Foundation President Gerald Randy Anderson, researcher ug historian nga si John Duresky, photographer ug documentation expert nga si Kevin Hamdorf, ug Filipino historian nga si Rhonie Dela Cruz.
Gipunting sa maong kalihokan ang pagdokumento ug pagpalambo sa kahinungdanon sa Shin’yō Maru shipwreck site aron mas mapreserbar ang kasaysayan niini ug mapadayon ang pagpaambit sa mga hitabo nga nalambigit sa maong lugar ngadto sa umaabot nga mga henerasyon.
Nagpakita usab ang maong inspeksyon sa lig-on nga panagtambayayong tali sa lokal ug internasyonal nga mga heritage advocates aron masiguro nga ang mga istorya ug sakripisyo nga nalambigit sa Shin’yō Maru dili malimtan ug magpabiling buhi sa panumduman sa katawhan.(JENIFFER JR. DELICA)
Source: Municipality of Liloy