Nakabenepisyo ang mga piling Grade 1 hangtod Grade 3 nga mga estudyante sa Polanco Central School gikan sa outreach program nga gipahigayon sa College of Liberal Arts, Mathematics, and Sciences Student Government (CLAMS-SG) sa Jose Rizal Memorial State University-Dipolog niadtong Hunyo 8.
Ang mga kabataan nakadawat og mga gamit pang-eskwela nga makatabang sa ilang adlaw-adlaw nga pagtuon. Gawas sa donasyon, nalipay usab ang mga estudyante sa nagkadaiyang kalihokan ug dula nga gihikay aron mapalambo ang ilang partisipasyon ug pagsalig sa kaugalingon.
Usa sa mga talagsaong bahin sa programa mao ang paghatag sa mga school supplies nga natigom pinaagi sa student accountability initiative sa CLAMS-SG. Imbis nga magpabiling simpleng silot alang sa gagmayng kalapasan sa estudyante, ang mga nahipos nga gamit gihimong donasyon aron makatabang sa mga kabataang nanginahanglan.(IKEN B. GULLEM)
Source: CLAMS Student Government Dipolog