Dili na kinahanglang mobiyahe layo ang mga mag-uuma sa lubi sa Barangay Cocob, Gutalac aron makadawat og serbisyong medikal human gidala mismo sa ilang komunidad ang “Bayaniyugan sa Kalusugan: Mobile Health Services” niadtong Mayo 18.
Pinaagi sa programa sa Philippine Coconut Authority (PCA), nakabenepisyo ang mga coconut farmers ug residente sa libreng medical consultation, eye check-up nga adunay libreng antipara, tambal, dental services, X-ray, ultrasound, CBC, ECG, urinalysis, ug uban pang healthcare services.
Kabahin ang maong inisyatibo sa Coconut Farmers and Industry Development Plan (CFIDP) nga nagtumong sa pagpaayo sa kahimtang sa mga mag-uuma pinaagi sa accessible nga serbisyo panglawas ug suporta gikan sa gobyerno.
Mitambong sa kalihokan si Governor Darel Dexter Uy uban sa suporta ni Congressman Ian A. Amatong nga girepresentahan ni Johannes Ruedas. Sa iyang mensahe, gipasiugda ni Gov. Uy ang pagtabang sa mga mag-uuma aron mapalambo ang ilang panginabuhian pinaagi sa modernong pamaagi sa pagpanguma ug dugang agricultural support.
Nagpasalamat usab si Gutalac Mayor Eddie Justin Quimbo sa PCA ug mga kaabag nga ahensya tungod sa pagdala sa libreng healthcare services ngadto sa lungsod.
Nahimo kining posible pinaagi sa panagtambayayong sa PCA Region IX, Provincial Government of Zamboanga del Norte, ug LGU-Gutalac aron mas mapadool ang kalidad nga serbisyo panglawas sa mga komunidad sa kabanikanhan.(IKEN B. GULLEM)
Source: Zamboanga del Norte Provincial News Network