Gidala sa Local Government Unit sa Salug ang nagkadaiyang serbisyo sa Barangay Canawan pinaagi sa Serbisyo Caravan niadtong Hulyo 2 aron mapadali ang paghatag og tabang ug programa sa mga residente.
Gipangulohan ni Mayor Dr. Ruth Brillantes ang kalihokan uban nila Dr. Mery Jean E. Bendijo, Dr. Cherry Lou Bareng ug Mrs. Ailyn Lomarda. Lakip sa gipahigayon ang Benteng Bigas Program nga nagbaligya og barato nga bugas aron matabangan ang mga pamilya batok sa pagsaka sa presyo sa pagkaon.
Gipahigayon usab ang Yakap Konsulta Caravan sa Rural Health Unit ug feeding program sa Municipal Nutrition Office diin nakadawat ang mga residente og libreng konsultasyon, tambal ug masustansyang pagkaon.
Dugang pa, naghatag og libreng binhi ang Municipal Agriculture Office alang sa mga mag-uuma samtang naghatag usab og libreng serbisyo sa rehistro ang Municipal Civil Registrar’s Office. Mitabang usab sa kalihokan ang mga Barangay Health Workers ug mga health personnel sa Barangay Canawan aron masiguro ang hapsay nga paghatag og serbisyo sa komunidad.(JENIFFER JR. DELICA)
Source: Municipality of SALUG