Nagkahiusa ang mga school personnel, barangay responders, ug kapulisan sa pag-andam sa Potungan National High School alang sa nationwide school safety drill nga ipahigayon sa Setyembre 3, 2026.
Gipahigayon ang coordination meeting sa eskwelahan diin mitambong ang 1st Zamboanga del Norte Provincial Mobile Force Company, 2nd FOB Platoon, uban sa external evaluators ug mga stakeholder aron masiguro nga klaro ang mga pamaagi ug responsibilidad sa matag partisipante.
Ang kalihokan usa ka preparatory activity alang sa Nationwide Simultaneous School Safety Drill for Active Attack Incidents, nga nagtumong sa pagsulay sa kahandam sa school community sa pag-atubang sa insidente nga mahimong makahatag og hulga sa kinabuhi ug kaluwasan.
Mitambong usab ang mga Barangay Tanod, PTA President, DRRM Coordinator, Child Protection Committee, Guidance Office, BSP Coordinator, School Nurse, Head Teachers, ug uban pang school personnel.
Gipunting sa mga partisipante ang panginahanglan sa tukmang koordinasyon tali sa eskwelahan ug mga first responders aron ang mga lakang sa panahon sa emerhensiya mahimong mas paspas, organisado, ug luwas.
Gawas sa pag-andam alang sa drill, ang maong panagtigom naghatag usab og higayon sa mga stakeholder nga masuta ang mga posibleng kakulangan sa response procedures ug matul-id kini sa dili pa ipahigayon ang aktuwal nga exercise.(IKEN B. GULLEM)
Source: PNP Zamboanga del Norte 1st Provincial Mobile Force Company