Giandam sa Dapitan City ang mga personnel nga motuman sa environmental regulations aron mas mahimong episyente ug hapsay ang pag-monitor sa mga paglapas sa balaod sa basura sa nagkalain-laing bahin sa siyudad.
Pinaagi sa training seminar nga gipahigayon sa City Environment and Natural Resources Office (CENRO) niadtong Agosto 25, 2026, gihatagan og praktikal ug legal nga kahibalo ang mga partisipante bahin sa hustong pagdumala sa basura, proseso sa apprehension, ug pagpatuman sa mga silot batok sa mga molapas sa environmental regulations.
Gipahigayon ang kalihokan sa Sangguniang Panlungsod Session Hall, diin gipunting ang pagpatuman sa Republic Act No. 9003 o Ecological Solid Waste Management Act of 2000 ug City Ordinance No. 2009-234.
Sa mensahe nga gihatod alang kang City Mayor Evelyn “Belen” T. Uy, giabiabi ni Atty. Linalyn Bation ang mga partisipante ug gidasig sila nga mahimong responsable ug determinado sa pagpatuman sa ilang mga katungdanan.
Gihisgutan ni Ms. Jamaica Burog sa City ENRO ang hustong segregation ug handling sa basura, samtang si Atty. Melquiades B. Potoy mipatin-aw sa mga legal nga probisyon, silot, ug enforcement mechanisms ubos sa City Ordinance No. 2009-234.
Giapil usab sa training ang administratibong proseso sa pagpatuman sa mga silot. Si OIC City Treasurer Kyrene A. Redillas mipasabut sa pagkolekta ug pagproseso sa mga multa, samtang si PMSg Agustin Uga mituki sa hustong apprehension procedures, legal protocols, ug mga lakang aron masiguro ang kaluwasan sa field operations.
Sa iyang closing message, gidasig ni CENR Officer Dr. George T. Olario, Jr. ang mga partisipante nga ipadayon ang makanunayon ug patas nga pagpatuman sa environmental laws.
Pinaagi sa maong kapasidad-building activity, gitinguha sa CENRO nga mas maandam ang mga environmental enforcers sa pag-atubang sa mga paglapas ug sa pagpatuman sa mga lagda nga nag-unang tumong mao ang pagpanalipod sa kalimpyo ug kahapsay sa Dapitan City.(IKEN B. GULLEM)
Source: Dapitan City Government