Katloan ug walo ka tuig sa pagpatuman sa Comprehensive Agrarian Reform Program (CARP) ang gisaulog sa Department of Agrarian Reform–Zamboanga del Norte (DAR-ZN), nga naghatag og higayon sa ahensya, mga mag-uuma, ug mga partner sa agraryo nga tan-awon ang mga nahimo sa programa ug ang mga buluhaton nga nagpaabot sa umaabot.
Ang anibersaryo nahimong paghinumdom sa taas nga panaw sa CARP sa pagtabang sa mga agrarian reform beneficiaries ug pagpalambo sa mga komunidad nga nagsalig sa agrikultura.
Gipangulohan ni DAR Provincial Agrarian Reform Program Officer (PARPO) II Daisy Dell Suan Digamon ang motorcade isip kabahin sa selebrasyon. Misubay kini sa mga dagkong kadalanan sa siyudad, nga nagsimbolo sa panaghiusa sa DAR ug sa ilang hiniusang misyon alang sa rural development.
Dugang sa motorcade, gihimong bahin sa selebrasyon ang traditional Filipino games, pickleball tournament, ug TikTok dance contest. Pinaagi niini, napalig-on ang panag-uban sa mga personnel ug mga partisipante ubos sa panawagan nga “One DAR, One Clan.”
Mitambong sa maong okasyon si Assistant Secretary Vinci A. Beltran, Director Agnes B. Mendoza, Zamboanga del Norte Governor Darel Dexter T. Uy, ug CSC Provincial Director Atty. Jerry N. Mayormita.
Gipasiugda sa mga opisyal ang panginahanglan nga ipadayon ang kalidad ug responsive nga serbisyo alang sa mga mag-uuma, nga giila isip mga importanteng haligi sa food production sa nasud. Gipahayag usab ni Governor Uy ang iyang bug-os nga suporta sa mga programa sa DAR ug sa pakigtambayayong sa nagkalain-laing ahensya aron mapalig-on ang agrikultura ug rural development sa probinsya.
Lakip sa mga gipasidunggan ang mga agrarian reform beneficiaries nga sila Flaviano T. Hilay sa Sindangan ug Antonia E. Mohametano sa Tampilisan. Ilang gipahayag ang pagpasalamat sa mga oportunidad nga ilang nadawat pinaagi sa DAR ug ang ilang paglaum nga mas daghang mag-uuma ang makabenepisyo sa umaabot.
Mitambong usab ang mga key officials sa DAR-ZN, mga Municipal Agrarian Reform Program Officers (MARPOs) gikan sa nagkalain-laing lungsod, ug personnel gikan sa DAR Central ug Provincial Offices.
Samtang milabay na ang 38 ka tuig sa CARP, nagpabilin ang tumong sa programa nga mapalambo ang kinabuhi sa mga mag-uuma ug mapalig-on ang mga agrarian reform communities. Ang anibersaryo nagsilbing pahinumdom nga ang agrarian reform usa ka padayon nga buluhaton nga nagkinahanglan og koordinasyon, dedikasyon, ug dugang nga suporta alang sa mga benepisyaryo.(IKEN B. GULLEM)
Source: DAR Zamboanga del Norte Province