Nagpadayon ang Sangguniang Bayan sa Sindangan sa pagpalig-on sa serbisyo publiko human gihisgutan sa ilang regular nga sesyon ang mga lakang nga nagtumong sa pagpaayo sa operasyon sa lokal nga panggamhanan ug pagpalambo sa serbisyo alang sa katawhan.
Usa sa mga sentrong hisgutanan mao ang proposed ordinance nga naghangyo og pagtugot kang Mayor Glona G. Labadlabad sa paghimo og tulo ka plantilla positions ilawom sa Municipal Environment and Natural Resources Office (MENRO), lakip ang Administrative Assistant, Planning Assistant ug Forest Ranger.
Gilauman nga makatabang kini sa pagpalig-on sa environmental programs ug pagpanalipod sa natural resources sa lungsod.
Ang maong ordinansa gisponsor ni Hon. Rainier V. Maningo, chairman sa Committee on Laws, Rules and Regulations.
Giaprobahan usab sa konseho ang hangyo nga motugot sa mayor sa pagsulod sa Contract of Service uban kang Atty. Victoria R. Manjaal isip Special Operation Executive Assistant II sa Municipal Mayor’s Office aron maghatag og dugang nga technical ug operational support gikan Abril 6 hangtod Oktubre 6, 2026.
Matud pa sa SB Sindangan, ang maong mga lakang kabahin sa padayon nga paningkamot sa lokal nga panggamhanan aron mas mapalambo ang kahusayan sa serbisyo ug mapalig-on ang pagdumala sa munisipyo.(IKEN B. GULLEM)
Source: Municipality of Sindangan