Giaprubahan ug gitagad sa Sangguniang Bayan sa Salug ang nagkalain-laing mga resolusyon ug agenda atol sa regular nga sesyon niini kaniadtong Hulyo 13, nga nagtumong sa pagpalig-on sa mga programa ug serbisyo alang sa mga residente.
Lakip sa mga gihisgutan ang pag-integrate sa walo ka prayoridad nga programa, proyekto ug kalihokan ngadto sa Annual Investment Program (AIP) sa 2026, ingon man ang Supplemental Annual Investment Program No. 1 nga giendorso sa Municipal Development Council (MDC).
Gihisgutan usab ang reprogramming sa pondo sa Local Disaster Risk Reduction and Management Fund (LDRRMF) aron mapalit ang usa ka coaster bus nga gamiton sa rescue operations sa lungsod.
Dugang pa, giduso ngadto sa konseho ang pag-apruba sa tulo ka aplikasyon sa tricycle franchise, samtang gidawat usab ang mga resolusyon sa Local People’s Council of Salug nga naghangyo sa pormal nga pag-ila niini isip opisyal nga representante sa mga accredited civil society organizations sa munisipyo.
Matod sa Sangguniang Bayan, ang maong mga lakang kabahin sa padayon nga paningkamot sa lokal nga pangagamhanan sa pagpalambo sa serbisyo publiko ug pagsuporta sa dugang kalamboan sa lungsod sa Salug.(IKEN B. GULLEM)
Source: Office of the Vice Mayor Municipality of Salug