Gipasiugda ni Governor Darel Dexter T. Uy ang kahinungdanon sa Saulog Job Fair isip usa sa mga inisyatiba nga naghatag og kahigayonan sa trabaho ug panginabuhian alang sa mga ZaNortehanon isip kabahin sa selebrasyon sa ika-74 nga anibersaryo sa pagkatukod sa probinsya sa Zamboanga del Norte.
Matud sa gobernador, ang maong kalihokan nagpakita sa tinguha sa Bag-ong ZaNorte nga masiguro nga ang kalamboan maabot sa tanang sektor sa katilingban. Iyang gipasiugda nga ang tinuod nga pag-uswag dili lamang masukod pinaagi sa mga imprastraktura kondili pinaagi usab sa mas maayong kalidad sa kinabuhi, lig-on nga trabaho, ug mas daghang oportunidad alang sa mga pamilya.
Gibalik-balik usab ni Gov. Uy nga ang pagpakunhod sa kapobrehon nagpabiling usa sa mga prayoridad sa iyang administrasyon pinaagi sa padayon nga pagpamuhunan sa edukasyon, agrikultura, mga programa sa panginabuhian, ug pagmugna og mga kahigayonan sa trabaho sa tibuok probinsya.
Nagpasalamat usab siya sa mga employer ug partner agencies sa ilang pag-abli og dugang nga oportunidad alang sa mga nangitag trabaho, samtang giawhag ang mga aplikante nga magpabiling masaligon ug mapadayonon sa pag-abot sa mga oportunidad nga mohaom sa ilang kahanas ug mga pangandoy.(JENIFFER JR. DELICA)
Source: Zamboanga del Norte Provincial News Network