Gibansay ang 200 ka mga tag-iya sa micro establishments sa lungsod sa Mutia bahin sa labor standards, occupational safety and health (OSH), ug emergency preparedness pinaagi sa Technical Advisory Visit (TAV), Safety Officer 1 (SO1) Training, ug First Aid Orientation nga gipahigayon sa Department of Labor and Employment-Zamboanga del Norte Field Office (DOLE-ZDNFO).
Gitinguha sa maong kalihokan nga mapalig-on ang kahibalo sa mga negosyante sa pagsunod sa mga balaod sa pamuo ug mga sumbanan sa kaluwasan sa trabahoan aron malikayan ang mga posibleng paglapas ug peligro sa ilang mga establisemento.
Atol sa pagbansay, gihatagan ang mga partisipante og kasayuran bahin sa labor standards, hazard identification, workplace wellness, ug mga lakang sa pag-andam alang sa emerhensiya. Gipasabot usab sa DOLE ang proseso sa Technical Advisory Visit, usa ka programa nga nagtabang sa mga negosyo sa pag-ila sa mga kakulangan sa compliance ug pagsabot sa mga regulasyon sa labor ug workplace safety.
Usa sa mga nahimong sentro sa kalihokan mao ang First Aid Orientation nga gipangulohan ni Franz Nico Reyes, LEO III, diin gitudloan ang mga partisipante sa hustong pagtubag sa kasagarang emerhensiya ug mga insidenteng panglawas pinaagi sa lecture ug praktikal nga mga ehersisyo.
Gihisgutan usab sa Safety Officer 1 Training nga gipangunahan ni Engr. Rashneev A. Ynawat, LEO III, ang mga peligro sa trabahoan, mga batakang prinsipyo sa OSH, himsog nga palibot sa trabaho, ug mga reportorial requirements. Nakigbahin usab ang mga partisipante sa mga workshop aron ilang mapraktis ang ilang nakat-unan.
Sumala sa DOLE, ang Technical Advisory Visit usa ka pamaagi nga nagtumong sa pagtabang sa mga micro establishments sa pagpalambo sa ilang pagsunod sa labor ug occupational safety standards samtang nagmugna og mas luwas ug mas himsog nga palibot sa trabahoan.(IKEN B. GULLEM)
Source: DOLE IX- Zamboanga del Norte Field Office