Gipasiugdahan sa Local Government Unit (LGU) Salug ang mas hugot nga pagpatuman sa sanitation rules sa public market atol sa meeting uban sa mga market vendors ug nagkalain-laing opisina sa munisipyo.
Ang maong panagtigom giapilan sa Rural Health Unit (RHU), Municipal Engineering Office, Municipal Environment and Natural Resources Office (MENRO), ug Municipal Treasurer’s Office aron hisgutan ang mga isyu nga nakaapekto sa kalimpyo ug kahapsay sa merkado.
Sa mensahe ni Municipal Health Officer Dr. Mery Jean Bendijo, gipasiugdahan niini ang kahinungdanon sa pagmintinar sa kalimpyo sa matag pwesto sa merkado, ilabi na sa mga namaligya og pagkaon. Gipahinumduman niya ang mga vendors nga sigurohon nga limpyo ang ilang palibot ug husto ang pagdumala sa ilang mga baligya aron malikayan ang kontaminasyon.
Lakip sa mga gipasiugda nga lakang ang pagbutang og plastic cover sa mga BBQ stand aron malikayan nga maabugan o masudlan og hugaw ang pagkaon. Gikinahanglan usab nga tabunan o protektahan ang tanang pagkaon nga ginabaligya aron masiguro ang kaluwasan sa mga mamalitay.
Gipahibalo usab sa RHU nga ang mga vendors nga makalapas sa sanitation rules pagahatagan una og duha ka warnings. Kon magpadayon gihapon ang paglapas, ipatuman ang angay nga aksyon sumala sa mga regulasyon sa merkado.(IKEN B. GULLEM)
Source: Municipality of Salug