Gisubay sa Barangay Resilience Team (BResT) sa Barangay San Francisco, Liloy ang nagkadaiyang bahin sa ilang komunidad aron mailhan ang mga lugar nga delikado sa kalamidad, mga panimalay nga mas vulnerable, ug mga pasilidad nga kritikal panahon sa emerhensya.
Gipahigayon ang Community Walk-through and Risk Mapping diin aktuwal nga gisuroy sa BResT ang nagkadaiyang lugar sa barangay aron masusi ang mga posibleng peligro ug kahimtang sa komunidad.
Lakip sa ilang giila ang mga hazard-prone areas, vulnerable households, critical facilities, evacuation routes ug mga community resources nga mahimong magamit panahon sa kalamidad.
Pinaagi sa direktang pagtan-aw sa kahimtang sa yuta ug pagpaminaw sa kasinatian sa mga residente, mas nasabtan sa team ang mga risgo ug hagit nga mahimong maatubang sa komunidad, lakip na ang mga kusog niini nga mahimong magamit sa pag-andam sa kalamidad.
Ang mga impormasyon nga nakolekta sa maong kalihokan mahimong gamiton isip basehan sa pagpalambo sa Community Risk Information and Planning (CRIP) process sa barangay.
Tumong niini nga masiguro nga ang mga plano sa pag-andam ug pagtubag sa kalamidad nakabase sa aktuwal nga kahimtang ug panginahanglan sa komunidad.
Gipasiugda usab sa kalihokan nga ang disaster preparedness dili lamang responsibilidad sa mga otoridad, kondili usa ka hiniusang buluhaton nga nagkinahanglan sa partisipasyon sa mga residente ug nagkadaiyang sektor sa barangay.
Kabahin kini sa mga paningkamot ubos sa KALAHI-CIDSS ug Philippine Community Resilience Project (PCRP) alang sa pagtukod og mas andam, lig-on ug resilient nga mga komunidad.(IKEN B. GULLEM)
Source: Kalahi CIDSS Liloy