Nagpakita og lig-on nga koordinasyon ang Local Government Unit (LGU) sa Gutalac ug National Police Commission (NAPOLCOM) human sa ilang panag-alayon sa pagdumala ug pagmonitor sa kapulisan aron mapadayon ang kalinaw, kahapsay ug kalidad nga serbisyo publiko sa lungsod.
Gihisgutan kini atol sa pagbisita sa NAPOLCOM sa LGU Gutalac niadtong Agosto 7, diin gitutokan ang papel, awtoridad ug supervision sa Local Chief Executive ibabaw sa kapulisan sa lungsod.
Nahimong higayon usab ang maong panag-uban aron masabtan ug masubay ang mga responsibilidad sa lokal nga pangagamhanan ug kapulisan, ilabina sa pagmintinar sa peace and order ug paghatag og epektibong serbisyo sa mga residente.
Mitambong sa maong engagement si Hon. Wilfredo Landong, Chairperson sa Sangguniang Bayan Committee on Peace and Order ug representante usab sa Peopleās Law Enforcement Board (PLEB).
Human sa diskusyon uban sa NAPOLCOM, nakigpulong usab ang lokal nga pangagamhanan sa mga personnel sa Gutalac Municipal Police Station nga gipangulohan ni PCPT Jonathan Lagang.
Gipasiugda sa LGU ang panginahanglan sa lig-on nga koordinasyon tali sa lokal nga pangagamhanan ug kapulisan aron mas dali ug tukma nga matubag ang mga isyu nga may kalabotan sa seguridad ug kalinaw sa komunidad.
Padayon nga gitinguha sa LGU Gutalac nga mapalig-on ang partnership uban sa kapulisan ug uban pang mga law enforcement stakeholders alang sa mas malinawon, luwas ug progresibong komunidad.(IKEN B. GULLEM)
Source: LGU Gutalac-Public Information