Gisugdan na sa City Government sa Dapitan ang pagpalig-on sa mga lagda alang sa pagpanalipod ug husto nga paggamit sa Dapitan City Plaza human pormal nga gipirmahan ug gisumiter ni City Mayor Evelyn “Belen” T. Uy sa Sangguniang Panlungsod ang gisugyot nga komprehensibong ordinansa.
Tumong sa proposed ordinance nga mas mapalig-on ang pagpreserbar, pagdumala ug pagpanalipod sa City Plaza ug sa mga makasaysayanong bahin niini, lakip na ang bantog nga Relief Map of Mindanao.
Ang lakang gisundan sa mga kabalaka nga gipahayag sa pipila ka Dapitanon bahin sa mga kalihokan sulod sa City Plaza, ilabina sa gikatahong wala masunod ang mga kasamtangang pagdili alang sa pagpanalipod sa Relief Map ug uban pang importanteng bahin sa heritage complex.
Tungod niini, gisusi sa City Government ang mga kasamtangang ordinansa ug polisiya nga nagdumala sa paggamit sa plaza, lakip ang pipila ka lokal nga balaod nga nagsugod pa niadtong 1998.
Nakita sa lokal nga pangagamhanan ang panginahanglan nga tipunon ug palig-onon ang mga lagda aron mas matubag ang mga kasamtangang hagit sa turismo, paggamit sa publiko, konserbasyon ug pagpatuman sa mga regulasyon.
Ubos sa gisugyot nga ordinansa, mas klaro nga mga lagda ang ipatuman sa paggamit sa plaza, samtang palig-onon usab ang pagpanalipod sa mga estruktura ug bahin niini nga adunay dakong bili sa kasaysayan.
Gilaraw usab niini ang mas klarong responsibilidad sa mga hingtungdan nga opisina sa City Government aron masiguro ang husto nga pagdumala ug pagpreserbar sa heritage site.
Dili lamang ang lokal nga pangagamhanan ang gipaabot nga moapil sa pagpanalipod sa makasaysayanong mga lugar. Gipasiugda usab sa proposed ordinance ang pag-apil sa mga eskwelahan, tourism stakeholders, mga residente, bisita ug ubang institusyon aron mapalambo ang kahibalo ug respeto sa kabilin sa Dapitan.
Ang pagsumiter sa ordinansa ngadto sa Sangguniang Panlungsod nagtuman sa unang saad sa City Government nga maghimo og mas komprehensibong polisiya human masusi ang mga kasamtangang lagda ug mga kabalaka nga gipahayag sa publiko.
Kabahin kini sa mas lapad nga paningkamot sa administrasyon ni Mayor Belen Uy ubos sa Bag-ong Dapitan nga agenda, diin gitinguha nga ang pag-uswag sa siyudad magpadayon nga kauban ang pagpanalipod sa kasaysayan ug kultural nga identidad niini.
Samtang nagpadayon ang pagpalig-on sa Dapitan isip usa sa mga heritage ug tourism destination sa rehiyon, gipasiugda sa City Government nga ang kalamboan kinahanglan dili makapahuyang sa pagpreserbar sa mga lugar nga nagsimbolo sa kasaysayan sa siyudad.
Gitinguha ang ordinansa sa lokal nga pangagamhanan nga mapanalipdan ang City Plaza, Relief Map of Mindanao ug uban pang heritage features aron magpabiling buhi ang ilang kahulugan ug bili alang sa mga Dapitanon ug sa umaabot nga mga henerasyon.(IKEN B. GULLEM)
Source: Dapitan City Government