Dapitan City – Naghatag og dayong aksyon si Dapitan Mayor Evelyn Uy human masuta ang kahimtang sa San Francisco Elementary School sa Barangay San Francisco. Atol sa pagbisita para sa turnover sa Healthy Learning Institutions equipment nga gipundohan sa Department of Health, personal niyang nakita ang naguba nga kisame, anay nga partisyon, ug kulang nga classroom.
Dihang nasuta ang sitwasyon, giaprubahan dayon sa mayor ang dugang nga classroom alang sa eskwelahan ug gimandoan ang City Engineer’s Office nga maghimo og full inspection sa estruktura sa mosunod semana. Ang lakang nagtumong sa paghatag og luwas ug angay nga learning environment sa mga estudyante.
Sulod sa milabay nga mga tuig, napugos ang mga magtutudlo sa pag-convert sa Office of the School Head ngadto sa makeshift classroom tungod sa kakulang sa pasilidad. Sa panahon sa kusog nga ulan, mosulod ang tubig sa atop ug mabasa ang salog nga makabalda sa klase.
Bisan sa kalay-on sa eskwelahan nga hapit 10 kilometro gikan sa sentro sa Piñan ug sa mga nangaging hangyo nga wala matuman, nagpabilin nga mapasalamaton ang mga magtutudlo sa paspas nga responde sa lokal nga panggamhanan. Naglaum sila nga masundan kini og pondo alang sa konstruksyon aron masiguro ang luwas ug tarong nga eskwelahan alang sa kabataan.(JENIFFER JR. DELICA)
Source: Zamboanga del Norte Provincial News Network