Personal nga mibisita si Dapitan Mayor Evelyn “Belen” T. Uy sa San Francisco Elementary School aron itunol ang ayuda ubos sa Healthy Learning Institution (HLI) Program, nga naghatag dakong kaayohan sa 97 ka tinun-an gikan Preschool hangtod Grade 6.
Nahimong ikaduhang tulunghaan ang maong eskwelahan sa Dakbayan sa Dapitan nga nakadawat sa maong programa. Lakip sa gipanghatag ang bass drum, lyre, badminton rackets, notebooks, bags, crayons, ug ang “Guntong Palad-Palad” (Subanen). Apil usab ang water tank, mga tubo, ug makina nga maoy dugay nang gipangandoy sa eskwelahan aron masulbad ang kakulang sa suplay sa tubig.
Sumala kang School Head Maricel Tablon, dako kaayo kini’g tabang sa kahimsog ug sanitasyon sa mga bata ug magtutudlo. Pinaagi sa bag-ong pasilidad sa tubig, masiguro na ang limpyo ug hapsay nga palibot sa pagtuon.
Kini nga personal nga presensya ni Mayor Uy nagpakita sa tinuod nga pagtagad sa lokal nga panggamhanan sa edukasyon ug kaayohan sa kabataan, nga naghatag og dugang kadasig ug paglaum sa tibuok komunidad sa eskwelahan.(IKEN B. GULLEM)
Source: City Government of Dapitan