DIPOLOG CITY — Gitapos sa City Government of Dipolog pinaagi sa pakigtambayayong sa Special Education Center, ang Culmination Program sa 2026 National Intellectual Disability Week ug Down Syndrome Consciousness Month niadtong Pebrero 20, 2026 sa D’Food Hub and Events Center sa Dipolog Boulevard.
Ang selebrasyon nga gipahigayon gikan Pebrero 14 hangtod 20 nagtumong sa pagpataas sa kahibalo, pagpalig-on sa inklusyon, ug paghatag og gahum sa persons with intellectual disabilities. Mitambong usab si City Mayor Roberto Y. Uy ug uban pang opisyal nga mipahayag sa ilang suporta sa maong adbokasiya.
Naghatag og dugang kolor sa kalihokan ang cosplay contest nga gipartisipan sa 10 ka estudyante gikan sa Special Education School, diin gipakita sa mga learners ang ilang talento, kahanas, ug pagsalig sa kaugalingon.
Pinaagi sa maong kalihokan, gipakita sa siyudad ang padayon nga komitment sa pagtukod og mas inklusibo nga komunidad diin ang matag indibidwal ginahatagan og bili ug oportunidad.(JENIFFER JR. DELICA)
Source: Dipolog City Government