Alang sa proteksyon sa mga basurero nga mapanalipdan sila batok sa sakit ug peligro sa ilang adlaw-adlaw nga buluhaton, si Mayor Evelyn T. Uy personal nga mi-turnover og mga protective gears ngadto sa mga garbage collector sa Dapitan City isip kabahin sa paningkamot sa lokal nga panggamhanan.
Lakip sa gipanghatag ang high-visibility safety uniforms, helmet, botas, ug uban pang protective equipment nga gidesinyo aron makahatag og hustong panalipod batok sa hugaw, delikadong materyales, ug posibleng impeksyon samtang nagkolekta sila og basura matag kaadlawon.
Gipasiugda ni Mayor Uy nga bililhon ang papel sa mga basurero sa pagmintinar sa kalimpyo ug paglikay sa pagkaylap sa sakit sa komunidad. Bisan sa kainit o ulan, padayon silang nag-alagad aron magpabilin nga limpyo ug organisado ang dakbayan, busa angay lamang nga mahatagan sila og igong proteksyon ug dignidad.
Dako usab ang pasalamat sa mga benepisyaryo nga nag-ingon nga kini maoy unang higayon nga sila nahatagan og kumpletong protective gears, nga nagpakita nga apil sa prayoridad sa administrasyon ang kahimsog ug kaayohan sa mga frontline workers.(IKEN B. GULLEM)
Source: Zamboanga del Norte Provincial News Network