Gitabangan dayon sa Emergency Medical Service o EMS personnel sa Dapitan City Fire Station ang usa ka nasamaran nga indibidwal nga nanginahanglan og daling medikal nga pag-atiman niadtong Hunyo 19.
Mitubag gilayon sa tawag ang Duty Shift “B” ubos sa pagpanguna ni FSINSP Rommel M. Rojas, REE, Acting City Fire Marshal. Pag-abot sa lugar, nagsul-ob og angayng personal protective equipment o PPE ang mga responder ug gisusi dayon ang kahimtang sa pasyente.
Nakaplagang adunay panimuot ug tarong nga nakatubag ang maong indibidwal apan adunay mga samad sa wala nga tuhod ug mga hiwa sa wala nga kilay ug aping. Gihatagan kini og hustong unang tabang ug giatiman sa mga responder aron malikayan ang dugang komplikasyon sa iyang kahimtang.
Human sa inisyal nga pag-atiman, luwas nga gidala ang pasyente sa labing duol nga pasilidad medikal alang sa dugang eksaminasyon ug pagtambal. Sumala sa Dapitan City Fire Station, padayon silang andam 24 oras matag adlaw sa paghatag og emerhensiyang serbisyo alang sa kaluwasan sa katawhan.(JENIFFER JR. DELICA)
Source: BFP R9 Dapitan City Fire Station