Gilayon nga gidala sa ospital ang usa ka batan-on human kini nakuyapan ug nakasinati og kaluya sa sulod sa Dapitan City National High School sa Lawaan, Banonong, Dapitan City, Biyernes, Hunyo 19.
Mihunong dayon sa maong lugar ang Emergency Medical Response Team sa Dapitan City Fire Station ubos sa pagpanguna ni FSINSP Rommel M. Rojas, REE, Acting City Fire Marshal, aron hatagan og tabang ang pasyente.
Pag-abot sa mga responder, ilang nakita ang pasyente nga naghigda sa usa ka couch, adunay panimuot apan huyang ug luspad samtang nagreklamo og pagkalipong ug kinatibuk-ang kaluya sa lawas. Gilayon siyang gihatagan og first aid samtang padayon nga gibantayan ang iyang kahimtang.
Narekord sa EMS personnel ang blood pressure nga 100/70 mmHg, pulse rate nga 84 ka pitik matag minuto, respiratory rate nga 20 matag minuto, temperatura nga 36.4°C ug oxygen saturation nga 99 porsyento. Human niini, luwas nga gidala ang pasyente sa Dr. Jose Rizal Memorial Hospital alang sa dugang eksaminasyon ug pag-atiman sa mga doktor.(JENIFFER JR. DELICA)
Source: BFP R9 Dapitan City Fire Station