Boluntaryong gitugyan sa mga residente ang duha ka armas, usa ka hand grenade, 90 ka bala ug unom ka magasin isip kabahin sa gipalig-on nga Small Arms and Light Weapons (SALW) Management Program sa 97th Infantry (KALASAGLAHI) Battalion niadtong Hunyo 25 ug 26.
Gipangunahan ni LTC Jessie G. Bergonia, Commanding Officer sa 97th Infantry Battalion, ug ni 1LT Astrid Jay D. Kaindoy ang implementasyon sa programa uban sa suporta sa lokal nga panggamhanan sa Baliguian ug Barangay Sta. Maria, Siocon.
Sumala sa 97th Infantry Battalion, ang tanang boluntaryong gitugyan nga armas, pampasabog ug uban pang kagamitang panggubat gipaagi sa hustong dokumentasyon ug giluwas ubos sa kustodiya sa militar subay sa umiiral nga mga polisiya.
Matud ni LTC Bergonia, ang boluntaryong pagsurender sa mga armas nagpakita sa pagsalig sa katawhan sa Philippine Army ug sa lokal nga panggamhanan, ug dako kini og ikatampo sa pagpalig-on sa kalinaw ug kaluwasan sa komunidad. Padayon usab niyang giawhag ang mga adunay walay lisensyang armas ug pampasabog nga boluntaryong itugyan kini sa mga awtoridad.(IKEN B. GULLEM)
Source: 97th Infantry “Kalasaglahi” Batallion