Posibleng mas mapaspasan ang plano sa Municipality of Salug alang sa kaugalingong fishing port human mipahigayon og benchmarking visit si Vice Mayor Michael I. Buzon sa Navotas Fish Port Complex, usa sa labing dako nga sentro sa fish trading sa Asia.
Tumong sa pagbisita ang pagkuha og ideya ug praktikal nga kasinatian gikan sa operasyon sa Navotas Fish Port Complex nga adunay 47 ka ektaryang pasilidad ug dugang pang 25-ektaryang reclaimed development area.
Nakigpulong si Vice Mayor Buzon kang Assistant Director Cerespink A. Aguila, Navotas City Mayor John Reynald M. Tiangco, ug Vice Mayor Tito M. Sanchez aron hisgutan ang posibleng kooperasyon sa fisheries development ug mga programang panginabuhian nga mahimong mapahiangay sa Salug.
Gibutyag usab sa mga opisyal sa Navotas ang ilang suporta sa giplanong fishing port pinaagi sa posibilidad sa pagbisita sa Salug aron maghatag og rekomendasyon ug teknikal nga giya sa pagplano sa proyekto.
Gilauman nga ang maong inisyatibo makatabang sa pagpalig-on sa industriya sa pangisda sa Salug pinaagi sa mas organisado nga fish trading, dugang oportunidad sa panginabuhi, ug pagduso sa lokal nga ekonomiya.
Ang benchmarking activity giisip usab nga lakang sa pag-andam sa lungsod alang sa dugayng plano sa modernisasyon sa fisheries sector ug pagpalambo sa coastal livelihood sa mga residente.(IKEN B. GULLEM)
Source: Office of the Vice Mayor Municipality of Salug