Nakab-ot sa Sindangan District Jail ang 100 porsyentong passing rate sa Alternative Learning System (ALS) Accreditation and Equivalency (A&E) Test human nakapasar ang tanang 20 Persons Deprived of Liberty (PDLs) nga mi-take sa eksaminasyon niadtong Marso 29, 2026.
Base sa opisyal nga resulta nga gipagawas niadtong Mayo 23, adunay walo ka PDLs nga nakapasar sa elementary level samtang 12 usab ang nakapasar sa junior high school level.
Gipasabot sa jail management nga ang maong kalampusan resulta sa padayon nga suporta sa administrasyon ubos ni JCINSP Arvin Dan R. Aguito, Jail Warden, ug sa kooperasyon sa mga ALS implementers ug educators nga mitabang sa paggiya sa mga PDL learners.
Dako usab ang papel ni JO1 Aimie M. Hamac isip ALS Implementer, uban nila Sir Gile B. Rusiana, Principal sa Balok Elementary School, ug Sir Voltaire Articulo, Teacher III sa Sindangan Pilot Demonstration School, sa pag-andam sa mga examinees alang sa maong assessment.
Gikonsiderar sa Sindangan District Jail nga dakong lakang ang maong kalampusan sa rehabilitasyon ug pagbag-o sa kinabuhi sa mga PDL pinaagi sa edukasyon.
Matod sa BJMP, nagpakita kini nga bisan sulod sa detention facility, adunay oportunidad alang sa pagkat-on, personal development, ug pag-andam alang sa mas maayong kaugmaon human sa ilang pagpabilin sa kustodiya.(IKEN B. GULLEM)
Source: Sindangan District Jail-BJMP R9