Gipadayon sa Department of Agrarian Reform (DAR) Zamboanga del Norte ang ilang hugot nga validation ug redocumentation process aron maprotektahan ang katungod sa mga Agrarian Reform Beneficiaries (ARBs) sa ilang mga yuta.
Pinaagi sa Redocumentation Completion Team (RCT), aktibong gihimo ang field validation, case build-up, ug mas lawom nga pagrepaso sa mga landholdings nga adunay kulang, nawala, o depektibong land transfer documents.
Ubos sa pagpanguna ni Provincial Agrarian Reform Program Officer II Daisy Dell Suan Digamon, gipaningkamotan sa DAR nga mahan-ay ug makumpleto ang tanang dokumentong may kalabutan sa agrarian reform beneficiaries aron malikayan ang posibleng problema sa legalidad ug pagpanag-iya sa umaabot.
Gibutyag sa DAR nga dakong tabang ang maong proseso sa pagpalig-on sa Land Tenure Improvement Program tungod kay masiguro nga tukma, limpyo, ug legal ang rekord sa matag benepisyaryo.
Lakip sa gihimo sa RCT ang pag-usisa sa mga discrepancies, pagrekonstrak sa mga nawalang papeles, ug pakigkoordinar sa mga stakeholders ug lokal nga ahensya aron mapadali ang proseso sa validation ug dokumentasyon.
Pinaagi niini, mas napalig-on sa DAR ang ilang paningkamot sa paghatag og luwas, lig-on, ug kasaligan nga pagpanag-iya sa yuta alang sa mga mag-uuma sa tibuok Zamboanga del Norte.(IKEN B. GULLEM)
Source: DAR Zamboanga del Norte Province