Nagpahigayon og health awareness activity ang Dakbayan sa Dipolog isip kabahin sa selebrasyon sa National Safe Motherhood Week aron mapalambo ang kahibalo sa publiko kabahin sa kahimsog sa mga inahan ug kabataan.
Gipahigayon ang maong kalihokan sa 3rd Floor sa Top Pension Plaza Hotel uban sa partisipasyon sa mga health workers ug lokal nga opisyal nga nagtinabangay sa pagpalig-on sa maternal ug child healthcare services sa siyudad.
Mirepresentar kang Mayor Roberto Y. Uy si City Councilor Dr. Niel Ryan Asprer, kauban sila Maternal, Newborn, Child Health and Nutrition Coordinator Mary Cris L. Torres, Nurse Supervisor Donnabelle V. Mutia, National Milk Feeding Program representative Lovely S. Ada, City Nutrition Action Officer Rizza Jane B. Zamoras, Oral Health Coordinator Dr. Gerard Abalos, ug HIV/AIDS Coordinator Anna Conception A. Penados nga nahimong resource speakers sa maong aktibidad.
Gihisgutan atol sa kalihokan ang kahinungdanon sa luwas nga pagmabdos, hustong nutrisyon, oral health, ug uban pang health concerns aron mas mapanalipdan ang kahimsog sa mga inahan, bag-ong natawo nga bata, ug pamilya sa komunidad.
Pinaagi niini, gipakita sa Dipolog City ang padayong commitment sa paghatag og accessible ug kalidad nga healthcare programs aron masiguro ang luwas ug himsog nga kaugmaon alang sa matag inahan ug kabataan.(JENIFFER JR. DELICA)
Source: Dipolog City Government