Dali nga miresponde ang personnel sa Salug Municipal Fire Station sa usa ka aksidente sa kadalanan nga nahitabo sa Brgy. Caracol ubos sa liderato ni SFO4 Roseller P. Taleon, Acting Municipal Fire Marshal.
Pag-abot sa responders sa lugar, ilang nakit-an ang usa ka babayeng pasyente nga naglingkod daplin sa dalan, conscious apan naglibog ang panghunahuna gumikan sa aksidente. Nakita usab ang samad sa iyang tuo nga aping ug ibabaw sa tuo nga kilay.
Gihatagan dayon og emergency first aid sa BFP responders pinaagi sa pagpahunong sa pagdugo, paglimpyo sa mga samad gamit ang povidone-iodine solution, ug pagbutang og sterile dressing bandages aron malikayan ang impeksyon.
Human sa initial treatment, maampingong gipasakay ang pasyente sa rescue vehicle sa MDRRMO ug gidala ngadto sa Liloy Integrated Health District Hospital alang sa dugang medical evaluation ug hustong pagtambal.
Nagpakita na usab ang BFP-Salug sa ilang kahandam ug paspas nga pagresponde sa mga emerhensya aron masiguro ang kaluwasan ug kinabuhi sa katawhan atol sa mga aksidente sa dalan.(JENIFFER JR. DELICA)
Source: Salug Bfp