Mokabat sa 329 ka mga runners ang naghiusa ug miapil sa DAYGON RUN 2025: A Run for a Cause, usa ka advocacy ug fundraising activity nga gitumong sa pagtabang ug pagpalambo sa kahimtangan ug kaayohan sa Persons Deprived of Liberty (PDLs).
Ang maong fun run gipasiugdahan sa Bureau of Jail Management and Penology (BJMP) – Liloy District Jail uban ang panagtambayayong sa lain-laing partner agencies sama sa Philippine National Police (PNP), Bureau of Fire Protection (BFP), Local Government Unit (LGU), ug nagkalain-laing civic ug volunteer organizations. Pinaagi sa hiniusang paningkamot, napalambo ang kalampusan sa kalihokan ug napalig-on ang panag-uban sa mga ahensya ug katawhan.
Sumala sa mga tigpasiugda, ang malikom nga pondo gikan sa DAYGON RUN 2025 gamiton alang sa mga programa nga maghatag ug dugang nga suporta sa rehabilitasyon, kahimsog, ug kinatibuk-ang kaayohan sa mga PDLs. Gilauman nga ang kalihokan dili lamang magpasiugda sa aktibong panglawas, kondili magpadayag usab sa pagpakabana ug responsibilidad sa komunidad sa pagtabang sa mga sektor nga nanginahanglan ug paglaum.(IKEN B. GULLEM)
Source: Liloy District Jail Bjmpix