Gipahigayon sa City Government of Dipolog pinaagi sa City Environment and Natural Resources Office (CENRO) ang ika-upat nga pagpagawas sa pawikan hatchlings sa Dipolog Boulevard kaniadtong Disyembre 15, 2025, isip kabahin sa padayon nga paningkamot sa siyudad sa pagpanalipod sa marine wildlife ug coastal ecosystems.
Sa kinatibuk-an, 56 ka mga pawikan hatchlings ang luwas nga gipagawas ngadto sa dagat, nga gipangunahan ni City Councilor Hon. Kenny Val U. Ong ug sa Officer-in-Charge–Assistant City ENRO Atty. Gratian Paul R. Tidor. Ang kalihokan nagpamatuod sa lig-on nga adbokasiya sa lokal nga panggobyerno alang sa konserbasyon sa kalikopan ug biodiversity.
Gipasiugda ni Atty. Tidor ang kahinungdanon sa maong kalihokan, ilabi na sa pagpanalipod sa nesting sites sa pawikan. Tumong usab sa kalihokan nga mapataas ang kahibalo ug panimuot sa katawhan mahitungod sa kahimtangan sa marine life ug ang papel sa komunidad sa pagpanalipod niini. Pinaagi sa maong inisyatiba, gipamatud-an sa City Government of Dipolog ang ilang padayon nga komitment sa pagpreserba sa kinaiyahan ug pagpanalipod sa kinabuhi sa dagat alang sa umaabot nga henerasyon.(IKEN B. GULLEM)
Source: Dipolog City Government