Nakab-ot sa City Government of Dipolog ang laing dakong kalampusan human kini makadawat sa 1st Year CROWN Maintenance Award atol sa National Nutrition Awarding Ceremony 2025 nga gipahigayon sa Manila Hotel kaniadtong Disyembre 15, 2025.
Girepresentar ang siyudad ni Zamboanga del Norte Provincial Governor Hon. Darel Dexter T. Uy, City Councilor Hon. Praxides P. Rubia nga mitambong alang kang City Mayor Roberto Y. Uy, ug City Nutrition Action Officer Ms. Riza Jane B. Zamoras.
Ang maong pasidungog nagpasabot sa padayon ug epektibong pagpatuman sa mga programa sa nutrisyon sa Dipolog City, lakip ang pagpanalipod sa kahimsog sa mga inahan ug kabataan, ug pagpaubos sa kaso sa malnutrisyon sa komunidad.
Sumala sa lokal nga panggobyerno, ang award usa ka pamatuod sa kusog nga panaghiusa sa lokal nga gobyerno, barangay, ug mga partner nga ahensya, nga nagtinabangay sa pagpalambo sa mga programa alang sa hustong nutrisyon ug maayong panglawas.
Pinaagi sa maong kalampusan, gipamatud-an sa City Government of Dipolog ang ilang lig-on nga komitment sa paghatag ug episyente nga serbisyo sa nutrisyon ug sa pagpalig-on sa kahimsog ug kaayohan sa tanang Dipolognon.(IKEN B. GULLEM)
Source: Dipolog City Government