Naghiusa ang nagkadaiyang sektor sa komunidad atol sa “Juana Run-for-a-Cause” nga gipahigayon sa Bureau of Jail Management and Penology Region 9 sayo sa buntag niadtong Marso 29, 2026 sa Dipolog Sunset Boulevard.
Ubos sa temang “We for Gender Equality and Inclusive Society,” ang kalihokan nagsugod alas 5:00 sa buntag, nga nagtumong sa pagpalambo sa gender equality ug pagpalig-on sa inklusibong katilingban. Miapil sa dagan ang mga personahe sa BJMP, lokal nga opisyal, miyembro sa komunidad, ug kababayen-an gikan sa BJMP Dipolog City Jail Female Dormitory.
Matud pa ni Rosemarie P Miranda, Executive Assistant IV ug Officer-in-Charge Provincial Information Officer nga maoy nahimong keynote speaker, ang pagkababaye usa ka gasa apan puno sa responsibilidad ug sakripisyo. Bisan pa niini, nagpadayon gihapon ang kababayen-an sa pagbangon ug pagpadayon sa ilang papel sa pamilya ug komunidad.
Ang maong fun run dili lamang pisikal nga kalihokan kundili simbolo sa panaghiusa, adbokasiya, ug paghatag og paglaum. Gipakita sa mga partisipante ang suporta sa usag usa samtang nagdagan, nga nagpalig-on sa panag-uban ug kahibalo sa mga isyung sosyal.
Sumala sa BJMP Region 9, magpadayon ang ilang mga programa nga naghatag gahum sa kababayen-an ug nagpalambo sa inklusibong katilingban.(IKEN B. GULLEM)
Source: Zamboanga del Norte Provincial News Network