Gihatag sa Bureau of Fisheries and Aquatic Resources ang usa ka modernong 62-foot tuna handline fishing boat alang sa mga mananagat sa Dipolog ug Dapitan human kini miabot ug midunggo sa Dipolog Breakwater sa Barangay Sta. Cruz, niadtong Marso 29.
Ang maong barko adunay kapasidad nga 20 gross tons ug makapadagan hangtod 10 knots, nga gipaandar sa generator ug baterya. Gisangkapan usab kini og fish finder, GPS, ug chart plotter, lakip ang fish holds nga makakarga og 3,000 kilo sa isda, life vests, 600-litro nga krudo, ug unom ka support bancas.
Sumala sa BFAR, kabahin kini sa ilang programa sa modernisasyon aron mapalambo ang kapasidad sa gagmay’ng mangingisda, madugangan ang ilang huli, ug masiguro ang luwas ug episyenteng pagpangisda.
Ang maong proyekto gipahimuslan sa Dipolog-Dapitan Ring Net Owners and Operators Association nga adunay kapin 70 ka miyembro, nga nagpasalamat sa gobyerno tungod sa dugang suporta sa ilang panginabuhian.
Gilauman nga pinaagi sa bag-ong pasilidad, mas mudako ang produksyon ug kita sa mga mangingisda sa maong lugar samtang padayon ang pagpalig-on sa ilang panginabuhian.(JENIFFER JR. DELICA)
Source: Zamboanga del Norte Provincial News Network