Gipagawas na sa mga organizer sa “Saulog sa Bag-ong ZaNorte 2026” ang opisyal nga rota ug iskedyul alang sa Grand Saulog Parade ug Street Dancing Competition nga kabahin sa pagsaulog sa ika-74 nga anibersaryo sa pagkakatukod sa probinsya sa Zamboanga del Norte.
Sumala sa anunsyo, magtapok ang tanang contingents sa Zamboanga del Norte Sports Complex alas 3:00 sa hapon sa Hunyo 1, samtang sugdan ang parada alas 4:00 sa hapon.
Samtang, magsugod ang parada gikan sa ZN Sports Complex padulong sa Gen. Luna Street, dayon moliko sa Herrera Street, Rizal Avenue, ug Quezon Avenue antes moagi sa Velasco Street paingon sa Dipolog Boulevard hangtod sa Saulog Area duol sa D’Food Hub and Events Center.
Lakip sa mga kalihokan sa “Saulog sa Bag-ong ZaNorte 2026” gikan Hunyo 1 hangtod 6 mao ang Opening Ceremonies, Saulog Queen 2026 Talent ug Coronation Night, Inter-Office Sportsfest, PESO Job Fair, Halad Pasalamat, ZaNorte Legacy of Dedication Award, ug Saulog Concert 2026.
Padayon usab nga gipakita sa maong kasaulogan ang kultura, panaghiusa, ug turismo sa Zamboanga del Norte pinaagi sa aktibong partisipasyon sa komunidad.(IKEN B. GULLEM)
Source: Zamboanga del Norte Provincial News Network