Nagpahigayon og dialogue ang Department of Agrarian Reform (DAR) Zamboanga del Norte kauban ang Land Bank of the Philippines (LBP) ug mga opisyal sa Agrarian Reform Beneficiaries of Marcelo Cooperative (ARBEMCO) aron hisgutan ang mas patas ug mas gaan nga loan repayment scheme alang sa mga miyembro sa kooperatiba.
Gisentro sa maong panagtigom ang pagpangita og pamaagi nga dili mabug-at alang sa mga agrarian reform beneficiaries sa pagbayad sa ilang mga obligasyon, ilabina sa mga mag-uuma nga naapektuhan sa kalisod sa panginabuhian ug produksyon.
Tumong sa maong lakang nga masiguro nga makapadayon gihapon ang mga miyembro sa ilang pagpanguma samtang hinay-hinay nga natuman ang ilang bayranan.
Matud sa DAR ug LBP, importante nga adunay klaro ug makatarunganong repayment plan aron malikayan ang dugang problema sa pinansyal ug mapalig-on ang operasyon sa ARBEMCO.
Plano usab nga ilakip ang maong sistema sa Manual of Operations sa kooperatiba aron mahimong giya sa umaabot nga pagdumala sa pautang.(IKEN B. GULLEM)
Source: DAR Zamboanga del Norte Province