Pagasugdan karong lunes Mayo 11 hangtod 15, 2026 ang selebrasyon sa Road Safety Awareness Month sa Municipality of Salug pinaagi sa Land Transportation Office (LTO) Region IX – Sindangan District Office, kaabag ang lokal nga panggamhanan sa lungsod.
Ang kalihokan ipahigayon sa Poblacion East Covered Court sugod alas-8 sa buntag, ug nagtumong sa pagpalig-on sa kahibalo sa publiko bahin sa road safety ug responsableng pagmaneho.
Lakip sa mga serbisyong itanyag sa programa ang libreng 15-hour Theoretical Driving Course (TDC), pagproseso sa student permit alang sa mga adunay kompleto nga requirements, smoke testing services, ug tabang sa motor vehicle registration.
Sumala sa LTO, ang maong inisyatiba kabahin sa padayon nga kampanya aron mapauswag ang disiplina sa mga motorista ug mapamenosan ang insidente sa aksidente sa kadalanan pinaagi sa edukasyon ug serbisyo nga duol sa katawhan.
Giawhag usab ang mga residente sa Salug ug kasikbit nga lugar nga moapil sa maong kalihokan aron makabenepisyo sa libre nga serbisyo ug kahibalo nga may kalabutan sa luwas nga pagmaneho.(IKEN B. GULLEM)
Source: Municipality of Salug