Gipalig-on sa Community Environment and Natural Resources Office (CENRO) Liloy ug sa lokal nga panggamhanan sa Godod ang panalipod sa Caguindangan Cave I pinaagi sa pagpirma sa Memorandum of Agreement (MOA) uban sa mga stakeholder ug community partners.
Tumong sa kasabutan nga masiguro ang hapsay nga pagdumala, konserbasyon ug malungtarong paggamit sa maong langob samtang giandam usab kini isip posibleng ecotourism destination sa munisipyo.
Naghiusa sa maong kasabutan ang Department of Environment and Natural Resources (DENR), LGU Godod, Barangay Raba ug ang land claimant aron mapanalipdan ang natural nga kahinguhaan ug mapreserbar ang kahimtang sa langob.
Mitambong sa pagpirma sila OIC Assistant Regional Director for Technical Services Cidur S. Julsadjiri, Conservation and Development Division Chief German M. Romano Jr., OIC CENR Officer Maribel G. Acama, Mayor Richie L. Uy, Punong Barangay Lucia M. Buhale ug land claimant Ana S. Caguindangan.
Sa wala pa ang pagpirma sa MOA, gipatin-aw usab ni Forester Merlou A. Rebuyas ang mga responsibilidad sa matag partido alang sa epektibong pagdumala ug pagpanalipod sa Caguindangan Cave I.
Matud pa sa mga opisyal, ang maong kasabutan maoy lakang aron mapreserbar ang natural nga atraksyon samtang makahatag usab og dugang oportunidad sa turismo ug panginabuhi sa lokal nga komunidad.(IKEN B. GULLEM)
Source: DENR ZAMBOANGA PENINSULA