Mikabat sa 2,290 ka mga pamilya sa Dakbayan sa Dapitan ug Lungsod sa Mutia ang nakadawat og tag-10 ka kilo nga bugas ubos sa Local Government Support Fund–Financial Assistance to Local Government Units (LGSF-FALGU) Rice Distribution Project, isip kabahin sa padayon nga paghatag og ayuda sa mga pamilyang nanginahanglan sa Zamboanga del Norte.
Sa Hulyo 30, nadawat sa 1,650 ka benepisyaryo sa Dapitan ug 640 sa Mutia ang ilang bugas. Lakip sa mga nakabenepisyo ang mga kabus nga pamilya, solo parents, senior citizens, ug uban pang sektor nga apektado sa pagsaka sa presyo sa mga batakang panginahanglan. Padayon usab silang makadawat og tag-10 ka kilo matag bulan hangtod Disyembre karong tuiga.
Gilauman nga ang maong ayuda makatabang sa pagpagaan sa adlaw-adlaw nga gasto sa mga panimalay ug makahatag og dugang nga pundo alang sa tambal, edukasyon, ug uban pang importante nga panginahanglan sa pamilya.
Magpadayon ang implementasyon sa LGSF-FALGU Rice Distribution Project sa ubang mga lungsod ug siyudad sa lalawigan aron mas daghan pang mga benepisyaryo ang maabtan sa programa.(JENIFFER JR. DELICA)
Source: Zamboanga del Norte Provincial News Network