Gipahigayon sa Zamboanga del Norte Police Provincial Office o ZNPPO ang Retirement Honors alang kang PBGen Romeo Juan Macapaz niadtong Mayo 26, 2026 didto sa Camp Lt. Deogracias G. Hamac sa Brgy. Sicayab, Dipolog City isip pagpasidungog sa iyang taas nga katuigan sa serbisyo sa kapolisan.
Gipangulohan ni PRO-9 Regional Director PBGen Edwin A. Quilates ang maong seremonya diin nagtigom ang mga retirado ug aktibong opisyal sa Philippine National Police, mga opisyal sa gobyerno, ug mga higala ni Macapaz aron personal nga motambong sa iyang pormal nga panamilit sa serbisyo.
Gihinumdoman sa kalihokan ang dagkong kontribusyon ni PBGen Macapaz sa kapolisan sugod sa iyang unang assignment sa Siocon, Labason, ug Dipolog City hangtud sa iyang pagkahimong 1-Star General ug pagdumala sa mga high-profile operations sa nasud.
Sa iyang mensahe, nagpasalamat si Macapaz sa suporta sa iyang pamilya ug mga kauban sa PNP samtang iyang gipadayag nga human sa pagretiro, mas hatagan na niya og panahon ang pag-atiman sa mga tanum ug kahayopan nga dugay niyang gikamingawan.(JENIFFER JR. DELICA)
Source: Zamboanga del Norte Provincial News Network