Gipalig-on sa Probinsyal nga Pangagamhanan sa Zamboanga del Norte ang koordinasyon sa mga ahensya aron mas mapalambo ang implementasyon sa Responsible Parenthood and Reproductive Health (RPRH) nga mga programa sa probinsya, kini gisabutan atol sa First Quarter Meeting sa RPRH Provincial Implementation Team nga gipahigayon sa Provincial Capitol sa Dipolog City.
Sa maong panagtigom, gipasiugda sa Commission on Population and Development Region IX ang kamahinungdanon sa tukmang datos ug panagtambayayong sa lokal nga pangagamhanan aron mas mapalambo ang mga serbisyo nga may kalabotan sa family planning, kahimsog sa inahan ug bata, ug kaayohan sa pamilya.
Gipaila usab ang Registry of Barangay Inhabitants and Migrants (RBIM), usa ka sistema nga gamiton sa mga barangay aron matala ang eksaktong datos sa mga residente ug migrante nga magsilbing basihan sa pagplano sa mga programa sa gobyerno.
Kabahin kini sa paningkamot sa probinsyal nga pangagamhanan ubos sa liderato ni Darel Dexter T. Uy aron mas mapalig-on ang mga serbisyong pangkalusugan ug programa alang sa mga pamilya sa probinsya.(IKEN B. GULLEM)
Source: Zambonorte del Norte Provincial News Network