Nakigkita si Gov. Darel Uy sa mga batan-ong doktor ubos sa Doctors To The Barrios (DTTB) Program sa Department of Health (DOH) nga karon nagserbisyo sa mga Rural Health Units (RHU) sa nagkalain-laing Local Government Units (LGUs) sa probinsya.
Sa maong panagtigom, gipadayag sa gobernador ang iyang pagpasalamat sa dedikasyon sa mga doktor nga bisan gikan sa nagkalain-laing rehiyon sa nasud, boluntaryong midawat sa hagit sa pagserbisyo sa mga komunidad sa Zamboanga del Norte.
Sumala sa probinsyal nga pangulo, dako ang papel sa DTTB Program sa pagpalig-on sa lokal nga sistema sa panglawas ilabi na sa mga lungsod nga wala pay permanenteng doktor. Pinaagi niini nga programa, naghatag og medikal nga liderato ang mga doktor aron mapalambo ang primary healthcare services ug masiguro ang patas ug kalidad nga serbisyo panglawas sa mga komunidad.
Nagpasalamat ang probinsyal nga gobyerno sa padayon nga komitment sa mga Doctors To The Barrios sa pagserbisyo sa katawhan samtang gipalig-on pa ang mga lokal nga programa sa panglawas aron masiguro nga maabot ang mas maayong serbisyo medikal sa matag komunidad sa probinsya.(IKEN B. GULLEM)
Source: Gov Darel Uy