Dako ang pagpasalamat sa mga residente sa Brgy. Punta Blanca, Manukan human nasugdan ang proyekto sa bag-ong dalan pinaagi sa paningkamot sa barangay ug sa suporta ni Konsehal Hon. Glenn Omaña.
Pinanguluhan ni Barangay Captain Hon. Beverly Villarin ang maong proyekto diin ilang gipadayag ang pagpasalamat sa tibuok Barangay Council ug kang Hon. Glenn Omaña alang sa libreng pagpahulam sa mga ekipo nga gigamit sa pagtrabaho sa dalan.
Sa mensahe ni Kapitan Villarin, iyang giila ang kooperasyon sa konseho ug sa katawhan sa barangay nga nagtinabangay aron mapadayon ang proyekto alang sa kaayohan sa komunidad. Giingon usab niya nga dako ang natabang sa suporta ni Hon. Omaña aron mapadali ang trabaho sa proyekto.
Mitambong usab sa kalihukan si Federated President Hon. Robby Earl Villarin uban sa mga opisyales sa barangay ug mga residente nga nagpakita sa ilang suporta sa maong kalamboan.
Samtang, gipahayag ni Hon. Omaña nga ang Brgy. Punta Blanca usa sa mga barangay nga nakahimo sa ilang proyekto pinaagi sa kaugalingong pondo. Matud pa niya, samtang ang ubang lugar nanghulam pa og pondo alang sa pag-eskrapo sa dalan, ang Punta Blanca nakahimo na og konkretong proyekto nga magamit sa katawhan.(IKEN B. GULLEM)
Source: Chicken State News Philippines