Mokabat sa 450 ka punla sa Lakatan banana ang gipang-apod-apod sa Zamboanga del Norte 2nd Provincial Mobile Force Company (ZNPMFC) ngadto sa mga benepisyaryo sa Retooled Community Support Program (RCSP) sa pipila ka barangay sa probinsya.
Ang maong mga punla donasyon ni Sindangan Mayor Hon. Glona G. Labadlabad ug gikuha sa ZN 2nd PMFC R-PSB Team ubos sa pagpanguna ni PLTCOL Edwin D. Verzon, Force Commander.
Target nga makadawat sa livelihood assistance ang mga residente sa Barangay Situbo sa Tampilisan, Barangay Cocob sa Gutalac, ug Barangay Mamawan sa Baliguian aron makadugang sa ilang panginabuhian pinaagi sa pagpananom og Lakatan nga saging.
Gipahayag sa kapulisan nga ang pag-apod-apod sa mga punla kabahin sa padayong programa sa gobyerno nga nagtutok sa pagpalig-on sa agrikultura, panginabuhian, ug kalinaw sa mga komunidad.(IKEN B. GULLEM)
Source: PNP Zamboanga del Norte 2nd PMFC