Malampusong napahigayon ang “Reactivation and Skills Enhancement Training” alang sa mga barangay tanod ug uban pang force multipliers nga gipahigayon sa Zamboanga del Norte Cultural and Sports Center, Barangay Estaka, ning syudad sa Dipolog kaniadtong Agosto 26, 2025.
Ang maong kalihokan gipangulohan sa Police Regional Office 9 pinaagi sa Zamboanga del Norte Police Provincial Office (ZN-PPO) ug Dipolog City Police Station, nga nagtinguha sa pagpalig-on sa kahibalo ug kahanas sa mga barangay tanod aron mas epektibong makapanerbisyo alang sa kalinaw ug seguridad sa komunidad.
Mitambong sa kalihokan sila si PLTCOL Edwin D. Verzon, Chief of Police sa Dipolog CPS, PCOL Jimmy M. Laguyo, Provincial Director sa ZN-PPO, Mr. Felipe T. Mangila Jr., City DRRM Officer, PCPT Roel L. Talaid, Deputy Chief of Police sa Dipolog CPS, ug City Mayor Roberto Y. Uy. Ang matag-usa kanila mipadayag sa importansya sa papel sa mga barangay tanod isip kauban sa pagpanghingusog sa kahapsay ug kalinaw sa maong syudad.
Usa sa mga gihatagan ug pagtagad mao ang presentasyon sa training overview nga gipangulohan ni PLTCOL Verzon ug ang pagtuki sa CAPEX/COMMEX nga gipasiugdahan sa Emergency Operations Center (EOC) ug Dipolog CPS Tactical Operations Center (TOC).
Gilauman nga pinaagi sa maong pagbansay, mas mapaligon pa ang koordinasyon tali sa barangay tanod, force multipliers ug kapulisan aron mapadayon ang malinawon ug luwas nga palibot sa Dakbayan sa Dipolog.(Jumalisa Papa)
Source: Dipolog CPS