Gipaila sa Zamboanga del Norte 2nd Provincial Mobile Force Company o ZN 2nd PMFC ang Revitalized Pulis sa Barangay o R-PSB Program atol sa community assembly sa Barangay Ipilan, Salug, usa sa mga geographically isolated and disadvantaged areas sa lungsod.
Gipangulohan ni Police Lieutenant Colonel Edwin D. Verzon, Force Commander, ang maong kalihokan nga nagtumong sa pagpalig-on sa panag-uban tali sa kapulisan ug komunidad pinaagi sa aktibong partisipasyon sa mga residente sa pagmintinar sa kalinaw ug kaluwasan.
Atol sa asembliya, gipasabot sa kapulisan ang katuyoan ug mga estratehiya sa R-PSB Program, samtang gidasig ang mga lumulupyo nga makigtinabangay sa mga programa sa kapulisan aron mapalig-on ang pagsalig ug maablihan ang komunikasyon tali sa duha ka panig.
Gilauman sa ZN 2nd PMFC nga pinaagi sa padayon nga panagtambayayong sa komunidad, mas mapalig-on ang kalinaw, kaluwasan ug malungtarong kalamboan sa Barangay Ipilan ug sa ubang kabaranggayan sa lalawigan.(JENIFFER JR. DELICA)
Source: PNP Zamboanga del Norte 2nd PMFC